Nagaland CM-in state Covid-19 information app tlangzarh

Nagaland chief minister Neiphiu Rio chuan Ningani khan Kohima-a Nagaland Civil Secretariat-a War Room-ah Nagaland Covid-19 information mobile application a tlangzarh.

CM Rio chuan an state mamawh tak, mobile application hlawhtling taka an siam avangin Department of Information Technology and Communication chungah lawmthu a sawi. He mobile app hian mipuite state chhunga Covid-19 hri leng dinhmun chiang zawka an hriat theihna turin a pui dawn hle a ni, a ti.

Hri leng leh vaccine chungchanga thu dik tawk lo thehdarh awm ṭhin chu pawi a tih thu sawiin, Rio chuan he App kaltlang hian mipuiten thu dik an hriat chian theih phah dawn tih a sawi. Data leh information dik tak pek chhuah a pawimawh thu leh, mipuite zirtirna ṭha pek a ṭul thu pawh a sawi bawk. He App-ah hian sorkarin kaihhruaina a siam leh hriattirna a tichhuah ṭhinte pawh dah zel a ni dawn a, Covid-19 test neih dan kimchang leh vaccine lak theihna hmunte chu map nen tarlan a ni ang.