Manipur : JNIMS-ah khum 100 awmna Covid-19 ICU hawng

Manipur chief minister N Biren Singh chuan kar liam ta Inrinni khan Imphal-a Jawaharlal Nehru Institute of Medical Sciences (JNIMS)-a khum 100 awmna, COVID-19 intensive care unit (ICU)/accident trauma centre siam thar a hawng.

CM Singh chuan ICU block hawn thar chu state mipuiten an chhawr ṭangkai dawn hle tih sawiin, nunna tam tak chhanhim a nih phah theih dawn a ni, a ti.

Hri leng mekah hospital leh sorkarte thawhdunna ṭha zawk a awm theihna turin sorkar chuan Covid-19 hospital lian pali - RIMS, JNIMS, Shija Hospital & Research Institute leh Raj Medicity-ah officer pathum zel awmna team a ruat tih CM chuan a sawi. Nunna chhanhim chu ngaih pawimawh ber a ni tih sawiin, sorkar chuan hospital leh staff, dam lo enkawlna kawnga inthlahdahte chungah action lak zel a nih tur thu a sawi.

State sorkar chuan Covid-19 hospital, Covid-19 care centre leh oxygen plant siamna kawngah theihtawp a chhuah zel thu sawiin, Singh chuan Kyamgei-ah khum 200 awmna Covid-19 hospital siam hna pawh DRDO puihnain thawh mek a ni, a ti.

Hill district hrang hrangah oxygen plant pawh siam chhoh mek anih thu sawiin, CM chuan sorkar laipui chuan an state-a oxygen plant siamna tur sum a sanction a, rei loteah heng plant-te hi hman theih an ni thuai dawn tih a sawi bawk.

Hri kaite enkawlna tur damdawi-in an ngah tawk tih sawiin, Assembly constituency tinah Covid-19 care centre leh facility dang, khum 2,000 chuang awmna siam a ni tawh a ni, a ti.

Mipuite chu hri darh tur venna atan sorkarin kaihhruaina a siamte zawm ṭha tura chahin, CM hri leng mek do hneh tur chuan mitin an pawimawh a, thawhhona ṭha an neih a ṭul thu a sawi.

JNIMS-a Covid-19 ICU hawn­na inkhawm buatsaihah hian agriculture minister Oinam Lukhoi, Rajya Sabha MP Maharaja Sanajaoba Leishemba, CM advisor (health) Dr Sapam Ranjan, Loktak Development Authority chairman L Susindar, Princial secretary V Vumlunmang leh JNIMS official-te an tel a ni.