Assam-in nitin mi nuai 3 vaccine pek tum : Sorkarin vaccine petu tur team 2,000 a din
Assam sorkar chuan Covid-19 vaccine chu nitin mi nuai thum hnenah pek a tum a, hemi atan hian vaccine petu tur team 2,000 a din.
Health minister Keshab Mahanta chuan kum 18-44 inkarte hnena vaccine dose hnihna thleng pekna turin Covaxin an ngah tawk tih a sawi. "Vaccine petu tur team 2,000 kan siam fel tawh a, nitin vaccine hi mi nuai li pek theih kan tum. Mahse tunah rih chuan ni khatah mi nuai thum pek phawt kan tum a, vaccine pawh kan dawn belh leh thuai kan beisei," a ti.
State-in vaccine stock a neih mek hi 3,80,900 a ni a, heng zinga 2,43,460 hi kum 45 chung lam tan niin, kum 18-44 inkar tan 1,37,440 a awm tih Mahanta chuan a sawi.
Minister chuan kum 45 chunglamte tana vaccine dose hnihna hi pek mek a ni a, kum 18-44 inkar dose hnihna pek dan tur pawh buaipui chhoh mek a ni bawk tih a sawi. "Dose hnihna pekna turah hian supply tlem avangin harsatna kan nei deuh a, district tin hnenah an mamawh thehlut tura hriattir niin, an mamawh ang hi thawn an ni ang," a ti.
Vaccine siamtu hnen aṭang an order-te an dawn avangin, sorkar chuan lo ruahman lawk tawh angin kum 18-44 inkar, mi nuai 1.92 hnenah Covaxin dose hnihna pawh a pe ṭan thei tawh dawn tih a sawi bawk.
Mahanta chuan Guwahati khawpuia cheng, mi nuai 12 zinga nuai 6.06 chuan vaccine hi an la tawh tih a sawi. Khawpui chhungah hian Inrinnni aṭang khan special vaccination drive kalpui a ni.