Tripura-in 100% vaccine pe hmasa ber nih tum : CM Deb

Tripura chief minister Biplab Kumar Deb chuan ram puma Covid vaccine pek chhuah kalpui mekah, an state chu puitling chin hnenah vaccine pe kim, 100% pe hmasa ber nih a tum tih a sawi.

CM Deb chuan kum 45 chung lam vaccine pek hna kalpui mekah an state chu India ramah a pe ṭha ber a ni mek tih a sawi a, state mipuite chuan vaccine lak pawimawhzia leh sorkar hmalakna hi an hriatthiam vang a ni, a ti.

Tripura-ah hian kar liam ta Nilaini thleng khan kum 45 chunglam 92% chuan vaccine hi a dose khatna an la tawh a ni. "100% vaccine pe thei hmasa ber nih kan tum a, kan tihhlawhtlin theih ngei pawh kan ring a ni," tiin CM chuan a sawi.

Vaccine leina atan hian sorkar chuan Rs vaibelchhe 134 a lo ruahman tawh a, mahse sorkar laipuiin state leh UT tinah a thlawna vaccine hi a pek leh dawn avangin, he fund hi healthcare infrastructure thuam ṭhatna tan hman a ni zawk dawn tih Deb chuan a sawi a ni.

Deb chuan, "State sorkarin medical college-a oxygen plant siam a rawtna chu sorkar laipui chuan a pawm tawh a, hei hian Covid-19 hri dona kawnga prime minister Narendra Modi inpekna pawh a lantir a ni," a ti.

State mipuite chu Covid-19 test nei ṭha tura chahin, taksa lama harsatna an nei a nih chuan doctor-te rawn vat turin a chah bawk.