Manipur loneitute'n lakhuihthei Rs nuai 78 man thawnchhuak tawh
Manipur-a lakhuihthei chingtute chuan kum 2018-2020 chhungin lakhuihthei metric ton 220, cheng nuai 78 man chu state pawn lamah an thawnchhuak tawh.
Manipur Organic Mission Agency (MOMA) chuan Pathianni aṭang khan kumina thawnchhuah tur, state chhung hmun hrang hranga lakhuihthei thar chu lakkhawm ṭan leh a ni tih a sawi. Pathianni khan kumina an thawnchhuah hmasakna ber tur, lakhuihthei MT 1.2 chu Bir Tikendrajit International Airport-ah additional chief secretary P Vaiphei chuan a vailiam a ni. Hei hi Guragon leh Jaipur-ah an thawn ang.
MOMA leh Krooshi Karma Naturals Private Limited, Imphal thawkdun chuan Gurgaon, Chandigarh, Mumbai, Delhi, Bangalore leh Jaipur-ah kumin chhungin lakhuihthei hi MT 250 thawnchhuah an tum. MOMA leh private firm dangte chuan lakhuihthei bakah Kiwi leh avocado chu kum 2018 aṭang khan state pawn lamah an lo thawnchhuak ṭhin tawh bawk.
Kumina lakhuihthei tharchhuah tam zawk thawnchhuah tum hi loneitute 900 velin an hlawkpui thei dawn a ni tiin MOMA chuan a sawi. Lakhuihthei an thawnchhuahte hi Queen variety a ni a, India ram hmun hrang hrangah Queen variety bik hi a demand a sang hle.
P Vaiphei chuan loneitute tan an thlai/thei thar zawrchhuahna kawngah manganna tur a awm lo tih sawiin, market intervention scheme hnuaiah state sorkar chuan horticulture products leina turin cheng vaibelchhe thum a dah a, an thil thar chhuahte hi leisakin hmun hrang hranga supply turin cold storage-ah dah a ni dawn a ni, a ti.
Vaiphei chuan MOMA te inpekna avanga state chhunga lakhuihthei thar chhuah a zawnin kum li chhung khawpui hrang hrangah thawnchhuah a ni tawh tih sawiin, hri leng karah pawh an thawn chhuak chhunzawm thei chu lawmawm a tih thu a sawi.