Meghalaya : Khur chima tangte chhanchhuah hna thawh chhunzawm

Meghalaya-a lungalhthei khur chima tangte chhanchhuah hna thawh chhunzawm mek a ni a, Navy team chuan Pathianni aṭang khan an pui.

Khur chim hi East Jaintia Hills district-a Umpleng hmuna awm a ni a, hnathawktu panga chu khur chimah hian ni 14 an tang tawh a ni. National disaster relief force (NDRF), state disaster relief force (SDRF) leh Fire service team-ten chhanchhuah hna hi an thawk a, mahse ruah a sur nasat avangin hna hi a thawh chak theih lo a, khur chhunga tui tling paih phawt a ngai a ni. Khur hi metre 152 vela thuk a ni.

State sorkarin Indian Navy puihna a ngen hnuah, Inrinni zan khan Navy team hian Khliehriat thlengin, khur chimna bulah camp an siam nghal a ni. Nimin aṭang khan remotely operated vehicles (ROV) hmangin khur chhungte an enfiah a, khur chhungah hian ruang pathum hmuh an ni tawh.

Chhiatna thlenna, lungalhthei khur hi phalna nei loa siam a nih avangin Meghalaya police-te chuan khur neitu, Shining Langstang chu an man tawh a, thubuai siamsak a ni tawh bawk. Hetih lai a manager erawh a bibo hman a, manna tur thupek tihchhuakin zawn mek a ni. January thla khan East Jaintia Hills district-ah vek hian lungalhthei khur a lo chim tawh bawk a, hnathawktu mi paruk an thi a ni.