Nagaland : Nitina inhlawhfa ṭhinte hnenah chhawmdawlna sem

Nagaland sorkar chuan nitina inhlawhfa ṭhin, lockdown avanga hna thawk mumal thei loa awm mekte hnenah Thawhṭanni khan buhfai, pulse, tel, sahbawn leh an mamawh tur dangte a sem.

Home department principal secretary, R Ramakrishnan chuan mi pakhat hnenah hian chhawmdawlna hi Rs 550 hu zel pek a ni tih sawiin, mi 30,000 vel hnenah sem a ni dawn tih a sawi.

Buhfai kg 10, lentil, chini, chi, purunsen leh purunvar kg khat ṭheuh, tel litre chanve, thingpuife gram 200, insukna leh inbualna sahbawn pahnih ve ve, masala leh chilli gram 100 ve ve an ni.

Ramakrishan chuan an thil sem hian sum lama harsatna tawk mek, nitina inhlawhfate mamawh tlem chu a lo chhawk ve thei dawn niin a sawi. Buhfai sem tur hi Food and Civil Supplies Department-in district tinah a thawn a, thil dangte rawh chu tualchhunga mi an lei tih a sawi.

Nagaland-ah hian May 14 aṭang khan hri leng vangin lockdown puan a ni a, hri leng dinhmunin ziaawm lam a la pan theih loh avangin lockdown hi ṭum thum pawhsei a ni tawh.