Assam : Private godown-ah FCI buhfai bag nuai khat man

Assam police-te chuan Kamrup district-a private godown pakhatah, Food Corporation of India (FCI) Meghalaya unit ta tur, buhfai bag nuai khat an man tih an sawi. Heng buhfaite hi hralhchhawn leh tura pack ṭhat mek an ni tih an sawi bawk.

Police-te hian thu an dawn bawhzuiin, district hotute nen Chhaygoan Industrial Development Centre-a private company godown an enfiah a, buhfai chheprelh ṭhahnem tak hi an man ta a ni.

Official-te chuan an buhfai man hi FCI buhfai, bag khat kg 50 zel a ni tih sawiin, private company hian lo siamremin, an company brand an tar a, Meghalaya-ah thawn an tum tih an sawi. Buhfai phurtu truck 13 pawh an man tel bawk.

FCI buhfai an manna company hian an siamṭhat leh hnuah Meghalaya-a Assam Rifles hnenah leh hmun dangah te an thawn tih sawiin, he thila inhnamhnawih zingah hian official-te pawh an tel ngei a rinawm thu an sawi. He company hi Maruti Quality Products Pvt Ltd (MQPPL) tih niin, company lian dangte nen pawh inzawmna an neih ngei a rinawm thu an sawi bawk.

MQPPL leh godown neitu hi Deepak Agarwal tih a ni a, buhfai man a nih hnu hian a bibo zui a, police-te chuan an zawng mek a ni.