Congress-in thupha chawi turin Manipur CM phut

Manipur Pradesh Congress Committee (MPCC) chuan chief minister N Biren Singh chu thil man sang leh sorkarin mipuite chhawmdawlna a pek chungchanga a thusawi danah thupha chawi turin an phut. CM thusawi chu hri leng tuar mek mipuite nuihsawhna a ni, an ti.

Chief Minister hian kar liam ta Zirtawpnia fuel man sang duh lohna lantira Congress party-in nawrh an huaihawt chungchang a sawiselnaah, prime minister Narendra Modi kaihhruai sorkar laipui chuan ram mipuite hnenah buhfai leh Covid vaccine a thlawnin a pe a, hei bakah chhawmdawlna programme hrang hrang pawh a kalpui mek a ni, a ti. "Hetianga a thlawna chhawmdawlna a pekte hi van aṭanga rawn tla a ni ngawt bik lo a, hei vang hian ṭhenkhatin a man an lo pek ve a ngai a ni," tiin fuel man san zel chungchangah sorkar laipui thlavang a lo hauh a ni.

MPCC hotu Govindas Konthoujam chuan CM chu mipuite harsatna tawh hriatthiampui lo leh nuihzatah a puh a, hei hian an state-a BJP sorkar ngaihdan pawh a pho lang a ni, a ti.

"Chief Minister chuan sorkar hmasa, Congress sorkarin kum 15 chhunga state tana an hnathawhte a zawt a, ka zawh let duh erawh chu Ibobi Singh kaihhruai Congress sorkarah khan cabinet minister a ni ve reng a ni lawm ni?," tiin Congress sorkar lai khan Singh chu sorkar thupuangtu pawh a nih tawh thu a sawi.

Kum 2017-a Manipur-a BJP sorkar a din aṭang khan Manipur mipuite chuan fuel leina aṭangin chhiah cheng vaibelchhe 702 an pe tawh tih a sawi. Hri a len hnu, financial year 2020-21 chhung pawhin sorkar chuan chhiah pek aṭang hian Rs vbc 167 a hmu a ni, a ti.

Kanthoujam chuan hri leng vanga harsatna tawkte ṭanpui leh chhawmdawlna turin state sorkar chuan mipuite hnenah sum eng zat nge a pek chhuah tawh zawtin, "Mipui mangangte hnena pe loin, CM chuan an lak aṭangin Rs vbc 167 zet a laksak zawk a ni," tiin a sawi.