Assam sorkarin curfew hun thlahdul

Assam sorkar chuan hri leng vanga curfew a puan chu Thawhlehni aṭang khan a thlahdul ṭhen.

Sorkarin kaihhruaina thar a tihchhuahah, Guwahati khawpui chhunga curfew puan hun chu darkar khatin tihtlem a ni a, chawhnu dar 2 aṭanga a tuk zing dar 5 thleng a huam. Sorkar leh private office, dawr leh sumdawnna hmun, restaurant, showroom, cold storage leh warehouse-te chu chawhnu dar 1 thleng hawn phalsak an ni tawh bawk. District dang pariatah curfew hi darkar li ṭheuhin tihtlem a ni bawk a, hetih lai hian district 24-a chawhnu dar 1 aṭanga a tuk zing 5 thleng curfew puan chu thlak danglam a la ni lo thung. District hrang hrang inkalpawh khap chhunzawm a la ni bawk.

June 21 thleng zirna in, sorkar leh private hnuaia mi pawh khar chhunzawm an la ni ang.

Health minister Kesbah Mahanta chuan hri kai thar tam zualna district panga - Cachar, Tinsukia, Dibrugarh, Sonitpur leh Nagaon district dinhmun chu ngun taka thlithlai reng a ni tih sawiin, June 21-ah hri lengin ziaawm lam a pan loh chuan khuahkhirhna khauh zawk kalpuiin, a ṭul anih chuan complete lockdown pawh puan a ni ang, a ti.

Hetih lai hian state sorkar chuan sorkar hnathawk, Covid-19 vaccine dose hnih la tawhte chu Thawhṭanni aṭang khan office kal turin a ti tawh a ni.