Tripura-a BJP buaina chingfel turin Central lama party hruaituten an tlawh

Tripura-a rorellai, Bharatiya Janata Party (BJP) chhungah boruak ṭha lo a awm a, an buaina chinfel sak dan ngaihtuahin Nilaini khan central lama party hotuten Agartala an thlen.

BJP national general secretary BL Santosh hoin central BJP hruaitute hi an kal a, state chhunga party hruaitu leh worker-te chu ni hnih chhung meeting neihpuiin, buaina chinfel dan tur an ngaihtuah dawn a ni.

Tripura-a BJP MLA ṭhenkhat chu chief minister Biplab Kumar Deb lakah lungawi loin, Trinamool Congress (TMC) zawm an tum nia sawi a ni. Tripura assembly inthlan hi kum 2023-ah neih a nih dawn avangin party hrang hrangten ṭan an la chho tawh hle. MLA lungawi lote hi health minister hlui Sudip Roy Barman leh amah thlawptute an ni.

Sudip Roy Barman hi TMC member a ni ṭhin a, mahse West Bengal-a TMC hruaitu Mukul Roy-a'n BJP a zawm khan a hnung zuiin a inlet ve nghal a ni. Mahse tun hnaiah Mukul Roy hi TMC-ah a kir leh a, hei vang hian Barman leh a ruala BJP-a lutte pawh an rilru a danglam nia sawi a ni. Barman hian a hmain chief minister nih a tum thute pawh a lo sawi tawh a, central-a BJP hruaitute hnenah CM Deb chu rorelna dan thiam tawk loha puhin, thlak tur pawhin a lo nawr tawh a ni.

Barman chuan party chhungah ngaihdan in an loh avanga harsatna an neih thu a sawi a, mahse BJP-ah nghet taka an la awm thu leh, MLA-te lungawi lohnate chu central lama hruaituten ngaihthlak sakin, chinfel dan tur an ngaihtuah dawn a ni, a ti.