Meghalaya : Naupang kum 14 hnuai lam hri kai 5,000 chuang awm
Meghalaya state-ah naupang kum 14 hnuai lam Covid-19 hri kai 5,000 chuang an awm tawh a, an zingah mi 17 in an thihpui tawh a ni.
State health minister Alexander Loo Hek chuan Nilainia chanchinbu mite nen an inkawmnaah he thu hi sawiin, hri leng thawh khatna leh thawh hnihnaa kum 14 hnuai lam hri kai hmuh chhuah chu mi 5,101 awm tawh a ni, a ti.
Minister chuan naupang hri kai an tam avang hian state sorkar chuan Shillong-a Ganesh Das hospital, West Garo Hills-a Turaleh West Jaintia Hills-a Jowai-ah hri kai naupangte enkawlna tur bik, pediatric hospital siam pawh a tum tih a sawi.
Health Minister chuan mitinte fimkhur zual zel turin a ngen a, hri leng thawh thumna chuan naupang chauh ni lo, mitinte a nghawng na leh hle thei tih a sawi.
State chhunga Covid-19 vaccine pek mekah, kar khat chhung daih vaccine an la nei tih a sawi. Hemi rual hian sorkar laipuiin June 21 aṭangin state tinah vaccine tam zawk supply a tum tih a sawi bawk.
Hek chuan state mipuite chu vaccine lak ngai pawimawh turin a ngen a, hei hi hri laka an himna tur chuan ni loin, an bul vela awmte venhimna tur a ni bawk a ni, a ti. Hripui leng mek laka invenhim theihna chu vaccine lak a nih thu a sawi.