Rajnath Singh-a'n AP-ah kawngpui siam thar hawng

Defence minister Rajnath Singh chuan Ningani khan Border Roads Organisation (BRO)-in North leh Eastern border area, Arunachal Pradesh, Ladakh leh Jammu and Kashmir-a kawngpui 12 an siam thar chu a hawng.

Kawngpui hawnna inkhawm hi Assam-a Lakhimpur district-ah neih a ni a, virtual hmangin Defence Miniter hian Aruanchal Pradesh-a 20-km-a thui, double lane Kimin-Potin road leh kawngpui dang pakua bakah, Ladakh leh Jammu and Kashmir-a kawngpui siam tharte chu a hawng a ni.

Ministry of Defence chuan heng kawngpuite hi BRO project, 'Arunank', 'Vartak', 'Brahmank', 'Udayak', 'Himank' leh 'Sampark' hnuaiah siam an ni tih a sawi.

Rajnath Singh chuan border area-a infrastructure lam tihhmasawnna tura BRO hnahthawhte fakin, a bikin Covid-19 hri leng karah ngawrh taka hna an thawk chhunzawm zel chu lawmawm a tih thu a sawi. Kawngpui siam tharte hi ramri chhehvela chengte leh, sipaite tan chak lakna kawngah a ṭangkai dawn hle a ni, a ti.

Defence minister hian nimin khan Assam-a Kamakhya Temple a tlawh bawk.

He temple hi Guwahati-a Nilachal Hills-a awm a ni a, Covid-19 hri leng vangin khar mek a ni. Rajnath Singh pawh hi temple chhungah lut loin, a kawngkapui pawn lamah a ṭawngṭai a ni.

Assam governor Jagdish Mukhi chuan Ningani zan khan Raj Bhavan-ah Rajnath Singh pualin zanriah a buatsaih a, he hunah hian chief minister Himanta Biswa Sarma, CM hlui Sarbananda Sonowal leh assembly speaker Biswajit Daimary-te pawh an tel.