Assam Congress MLA Kurmi a bang

Assam Congress MLA Rupjyoti Kurmi chuan nimin khan Congress party a chhuahsan a, Assam Legislative Assembly member a nihna aṭanga banna a thehluh nghal bawk. BJP a zawm dawn tih a sawi nghal bawk.

Kurmi-a'n Assam Legislative Assembly Speaker Biswajit Daimary hnenah MLA a nihna aṭanga banna hi a thehlut nghal a, Speaker official chamber-a banna a thehluh lai hian BJP hruaitu thenkhatte an awm a ni. Kurmi chuan rorellai party, BJP a nih chuan a bialte tan ṭha zawkin hna a thawk thei dawn niin a sawi.

MLA atana ṭum li thlan tlin tawh, Rupyoti Kurmi chuan Congress hruaitute chuan hruaitu ṭhalai zawkte thu leh hla an ngaihthah nia sawiin, party hruaitu Rahul Gandhi chu hruaitu mawhphurhna la zo loah a puh. Party hotute chuan hruaitu ṭhalai zawkte thu an ngaihthah avangin state tinah Congress dinhmun chu a chhe zel a ni, a ti. Rahul Gandhi chu hotu a nih chhunzawm zel chuan an party chuan hma a sawn dawn lo niin a sawi a ni.

Daimary chuan term li MLA atana thlan tlin anih tawh chung leh, tea community aiawh a ni chungin Congress hruaitute chuan an party-a post pawimawh, state party president, assembly-a leader of opposition dinhmunte chu pek an tum ve ngai lo tih a sawi bawk.

Assam Pradesh Congress Committee (APCC) chuan nimin vek khan Kurmi hi party duhdan kalha a chet avangin party aṭangin hnawhchhuah nghal a ni tih a sawi. Kurmi-an BJP zawm a tum avangin thlan tlin a nihna, Mariani constituency tlawh turin member pathum awmna committee chu APCC president Ripun Bora chuan a din nghal a ni.