Nagaland minister thusawi danah UNC an lawm lo

Manipur-a Naga pawl lian ber, United Naga Council (UNC) chuan Nagaland political issue chungchanga Nagaland minister Temjen Imna Along thusawi danah an lawm lo tih an sawi.

State BJP president ni bawk, minister Along hian Core Committee on Naga Political Issue (CCNPI) din chungchang a sawinaah, "Nagaland buaina chinfel dan tur India ram danpui leh Indian union hnuaiah vek siam a ni ang. India Constitution hnuaiah Naga mite tana ṭha tur ang chu ngaihtuah a ni dawn a ni," a ti.

Hemi chungchangah hian Ningani khan UNC chuan thuchhuah siamin, minister thusawi dan hi kum 70 chhung Nagaland tana thisen hlan a, nunna petute inpekna ngaih pawimawh lohna leh, Naga buaina chu politics lama hlawkpui lo tumna remchanga hman tumah an puh a ni.

Minister thusawi danah hian an lawm lo hle tih sawiin, UNC chuan Indo-Naga peace inbiakna kal mek laia, Nagaland BJP president ni bawkin hetiang thu a sawi hi an dem thu sawiin, a insiamṭhat ngei an beisei tih an sawi.

Naga organisation leh political party dangte pawhin minister thusawi hi an dem thu an sawi bawk.