Manipur-ah gold biscuit kg 43 chuang an man

Directorate of revenue intelligence official-te chuan beihpui an thlaknaah Imphal, Manipur aṭangin gold biscuit kg 43 chuang, cheng vaibelchhe 21 hu an man.

Gold biscuit hi Thawhlehni khan an man a, Imphal khawpuia car pakhat an dapna aṭangin an hmu a ni. Car hi tidingin, car-a chuang mi pahnihte chu thu zawtfiahin an motor an dap a, motor chhung hmun pathum, thil thurukna tura an siamah gold biscuit-te hi an man ta a ni. Car chhung gold biscuit an thurukte lakchhuah nan hian darkar 18 vel zet hun an hmang niin official-te chuan an sawi.

Manipur-ah hian hri leng vanga lockdown puan chhung pawhin Myanmar ramri kaltlangin rangkachak an tawlh nasa hle nia sawi a ni. Thla thum kalta chhung khan rangkachak tawlhruk kg 67 vel man niin, heng hi cheng vaibelchhe 33 chuang man an tling a ni.