AP zirlaiten Chakma-in Mishmi ram an luah tum dodal

All Arunachal Pradesh Students' Union (AAPSU) leh All Mishmi Students' Union (AMSU) chuan an state-a Chakma refugee-ten Lohit district-a Khatan khuaa Mishmi ram luah an tum chu dodalin, state sorkar chu hemi chungchangah hian insawifiah turin an phut.

Zirlai pawl pahnihte chuan Lohit leh Changlang district inkara reserved forest area-a cheng, Chakma-te chuan Khatan khaw ram hi luh an tum niin an sawi. Kar liam ta khan Chakma-te hian Khatan khaw mite chu lungin an tawng a, van lam hawiin silaite pawh an hmetpuak niin an sawi a ni.

AMSU president Asendo Mitti chuan Chakma-te hian Mishmi ramah hian monastery bakah inte pawh an sa tawh nia sawiin, kawngpui pawimawhte pawh an dang a ni, a ti. "Tualchhung mite he thil an hriat hian thuneitute hnenah an thlen nghal a ni. Police team leh ram neitute chu kar liam ta Nilaini khan enfiah tumin an kal a, mahse Chakma-te hian kawng lakah lo langin lung leh hmanraw dangte kengin an lo pungkhawm a, police-te pawh an tawlhkir a ngaih phah a ni," tiin a sawi. Hemi zan hian Chakma-te hi Khatan khuaah hian lutin, khaw chhung mite pawh an rawn bei zui a ni, a ti.

AAPSU general secretary Tobom Dai chuan Mishmi thlahtute ram chu dan loa Chakma awmte luahsak an tum chu state dan zah lohna leh, state mipute zah lohna lian tak a ni, tiin a sawi bawk. State sorkar chu he thil thleng enfiah tur hian high-level ministerial team tir thuai tura an phut thu a sawi bawk.