Hri vanga thi zinga 99.7% in vaccine la lo : Nagaland Health Dept

Nagaland health and family welfare department chuan kumin February thla hnu lama an state chhunga Covid-19 hri vanga thi zinga 99.7% chu vaccine la lo an nih thu a sawi.

Department data-a a lan danin, February thla aṭang khan state chhungah Covid vanga thi mi 375 an awm a, an zinga pakhat chauh hi vaccine dose la kim tawh niin, dose hnihna a lak aṭanga kar hnih hnuah hri vang hian a thi a ni. Hri vanga thi pakhat chu vaccine dose khatna la, mahse a vaccine lak aṭanga kar hnih tlin hmaa thi a ni.

Health department chuan data aṭang hian vaccine dose khatna chauh la pawh an lak aṭanga kar hnih hnuah chuan vaccine hian a thawk ṭha nia alan thu an sawi. Hemi rual hian vaccine dose la kim tawh pawhin hri hi an la kai ve thei reng tih sawiin, mahse clinical trial-a lantir angin a takah pawh hri la na lutuk tur vennaah a rintlak ngei a ni, a ti.

Nagaland hian January 16-a ram pum huapa vaccine pek runpui kalpui a nih aṭang khan state chhungah vaccine hi pe chhuak ve nghalin, healthcare worker-te pek hmasak a ni. Health department chuan Covid-19 hospital-a thawk, healthcare worker-te chu vaccine dose la kim tawh an ni tlangpui tih sawiin, an zingah hri vanga thi an la awm lo tih a sawi.