Assam CM-in state chhunga district ṭhenkhatah Complete lockdown a puan a ṭul maithei tih a sawi

Assam chief minister Himanta Biswa Sarma chuan state chhunga district ṭhenkhatah chuan hri kai thar zatin tlakhniam lam a pan loh chuan complete lockdown puan a ṭul maithei tih a sawi.

CM chuan hri leng hluar zualna district 6/7-ah tunkar chhung hian positivity rate a tlakhniam loh a, hri lengin ziaawm lam a pan loh chuan ni 10 chhung lockdown puan a ngai dawn niin a sawi. Heng district-te hi an state-a hri leng thawh hnihna thlen reina chhanah an ngai a ni.

State health minister Keshab Mahanta pawhin hri leng ziaawmna bialah pawh khuahkhirhnate hi siam a ni maithei tih sawiin, "Ni hnih khat hnuah district dinhmun ṭha lo zualte chungchang kimchang zawkin kan hre thei ang a, hma lak dan tur pawh ruahman a ni ang," tiin Pathianni khan a sawi.

Health minister chuan state khawpui bikah chuan hri kai thar zat hi an tlahniam tawh hle niin a sawi a, hei hi test neih ṭhat vang nia a lan thu a sawi bawk. Mahse invenna kalpui zel a nih tur thu leh, district inkalpawh pawh khap chhunzawm a ni rih tur thu a sawi a ni.