AP-in thla tum chhungin vaccine pek kim hman tum

Arunachal Pradesh chief minister Pema Khandu chuan deputy commissioner-te chu an bial ṭheuhah Covid-19 vaccine pek chhuah hna chak zawka kalpui tura hrilhin, kum 18 chunglamte chu thla thum chhunga vaccine pek kim vek hman an tum tih a sawi.

Thawhṭannia CM Khandu chuan thla tina a neih ṭhin, e-Pragati meeting chu commissioner, secretary leh deputy commissioner-te a neihpui leh a ni.

Khandu chuan, "Tunah chuan vaccine pek chhuah hi category pakhat chauh, kum 18 chung lam tan kalpui a ni," tiin chak zawkin vaccine pek chhuah hi an kalpui thei tawh dawn tih a sawi.

DC-te chu vaccine la thei chinte vaccine la vek tura fuih tur leh, a la turte tan pawh a hmaa registration lo tih lawk kher ngai loa a hmuna tihchawp theih tura ruahman turin a ti bawk. Tualchhunga mi lar leh hriat hlawhte chu vaccine lak pawimawhzia campaign-naa hmang ṭangkai turin a chah bawk a ni.

"September thlaah chuan puitling chin chu vaccine hi pek vek hman a, India rama ti thei hmasa ber state nih kan tum a ni," tiin Khandu chuan a sawi.

Vaccine hi district hrang hrangah an mamawh ang zelin pek a ni dawn tih sawiin, district thuneitute hnenah pawh an mamawh zat hi hrilh lawk ṭhin tura tiin, sorkar laipui aṭanga an dawnte chu state department chuan a ṭul angin a sem darh zel dawn a ni, a ti.

Meeting-ah hian CM chuan DC-te chu an district huam chhunga project pawimawh leh an ngaih pawimawhte tarlang ṭhin tura chahin, project thawhna hmunah pawh kar tin anmahni ngei kal a, hma sawn dante enfiah ṭhin turin a ti a ni.

CM-in 108 ambulance service a hawng
Chief minister Pema Khandu chuan state civil secretariat-ah Thawhṭanni vek khan '108 emergency response ambulance service' a hawng.

He service hnuaiah hian ambulance 90 chu state chhung hmun hrang hrangah service tir an ni dawn a, GVK EMRI (Emergency Management and Research Institute) in Centralized Call Centre kaltlangin a enkawl ang. A enkawltu tur hian trained pilot 133, emergency medical technician 146 dah an ni a, ambulance-te hi basic life support equipment hmanga thuam vek an ni.

Dial 108 system hi central call centre kaltlangin, state chhung khawi hmun aṭang pawhin koh theih an ni ang. Ambulance-te hi 24x7 service-in shift hnih, darkar 12 zelin an duty ang.

Ambulance 90 zinga 30 hi state sorkarin North-East Special Infrastructure Development Scheme (NESIDS) hmanga a lei a ni a, 48 hi sorkar laipui hnuaia Scheme for Special Assistance to States for Capital Expenditures hmanga a lei a ni bawk.