Manipur actor-in Punjab-ah NE mite tan Covid vaccination camp ṭum hnihna buatsaih

Manipur actor leh model Sushanta Rajkumar, RK Sushant tia hriat lar chuan a ṭum hnihna atan Punjab-ah hmarchhak mite tan Covid-19 vaccination camp a buatsaih leh.

Hmarchhak mite tan bika vaccine lakna tur hi Chandigarh, Panchkula leh Mohali-ah buatsaihin, mi 200 chuangten vaccine hi an la a ni. May thla khan RK Sushant hian hmarchhak mite tan hian vaccination camp hi a lo buatsaih tawh bawk.

"Hripui leng mek karah hriselna leh himna hi a pawimawh. Zirna leh hnathawhna avanga mahni state chhuahsan a, hmun danga awmte pawh ngaihtuah tel an ngai a ni. Hei vang hian hmarchhak state aṭanga kal, Chandigarh leh a chhehvela awm mek, vaccine la ve mai thei lote tan he camp hi ka buatsaih a ni. Hei hi hmarchhak bialte duhsakna leh thlawpna tam tak ka dawn ka chhan let ve theihna tlemte a ni," tiin Sushanta chuan a sawi. India ram khawpui lian dangah pawh buatsaih a la tum tih a sawi.

Hmarchhak mite tana vaccination camp buatsaih hi Punjab health department hnuaia doctor leh medical professional-ten an pui a; vaccine late hi Arunachal Pradesh, Assam, Manipur, Mizoram, Nagaland leh Sikkim aṭanga kalte an ni.