Hri dona kawnga hma la chak turin Nagaland sorkar phut

Nagaland-a eptu party, Naga People's Front (NPF) chuan an state-a hri leng a ziaawm chhoh a, positivity rate tihniam turin state sorkar chuan chak taka hma a lak a ngai a ni, a ti.

State health minister S Pangnyhu Phom-a'n sorkar laipuiin kaihhruaina a siam angin, positivity rate chu 5% hnuai lam a nih hma chuan state chhunga lockdown puan chhunzawm zel a ni dawn tih a sawi a ni. Hei hi NPF chuan chhangin, state sorkar chu ṭhu mai mai loin, hri leng a ziaawm theihna tura theihtawp chhuah turin an ti a ni.

Hei bakah hian eng vangin nge sorkar laipui chuan positivity rate 5% hnuai lam a nih hma lockdown puang tura a tihna chhan an zawt nghal bawk.

District hrang hranga medical facility-te thuam ṭhat a, thawktu indaih lohna hrang hrang awmte ngaihven a nih loh chuan sorkar chuan eng angin nge positivity rate tihniam tura hma a lak dawn an zawt. State sorkar lockdown vanga mi tam takin harsatna an tawh dante ngaihtuah chunga thutlukna siam ṭhin turin an ngen bawk.

Hri leng dona chhuan­lamah state fund-te dik lo taka hmanga sorkar an puh bawk a, district hrang hranga medical kits indaih lohna thleng mek chungchang pawh an sawichhuak a ni. Sorkarin pulse oximeter leina atan cheng nuai 40 chuang a seng a, a sum sen nena ngaihtuah chuan district tinten hian 200 chuang ṭheuh dawng tur an nih laiin an indaih lo hlawm hle tih an sawi. Hei bakah hian medical equipment dang pawh district hospital dinin an mamawh a, state sorkar chuan hei hi ngaihtuah sak thuai se an duh tih an sawi a ni.