AAPSU-in BRO lakah FIR thehlut

All Arunachal Pradesh Students’ Union (AAPSU) chuan Border Roads Organization (BRO), Kimin chief engineer Pramod Kumar leh official dangte lakah AP-a khaw pakhat hming an tihdik loh avangin FIR an theh lut.

He khua hi Assam state chhunga mi angin minister Rajnath Singh-a'n Assam-a programme a hmannaah an pholang a, chu chu an duh lo a ni.

Zirlai pawl hian Itanagar police station-ah Thawhlehni khan FIR hi an thehlut a ni. Hemi rual hian BRO chu an thiltih avanga state mipuite hnena ngaihdam dil turin ni 10 chhung hun an pe nghal bawk.

AAPSU president Hawa Bagang chuan he thil thleng hi chhui chian nghal an phut thu leh, state sorkar pawh an sawipui tur thu a sawi. BRO hian Arunachal Pradesh mipuite hnenah ngaihdam an dil lo a nih chuan, AAPSU chuan an state-a an camp-te lungawi lohna lantir an tum tih a sawi. BRO hian zirlai nawrh huaihawtte hi an lo bei let a nih chuan a ṭul dan apianga hma an lak chhunzawm tur thu a sawi bawk a ni.

Defence minister Rajnath Singh-a'n kar liam taa Assam-a BRO kawngpui siam 12 a hawn ṭum khan, Arunachal Pradesh-a Papum Pare district-a ADC headquarters, Kimin chu Assam state ami angin an tarlang tih AAPSU general secretary Tobom Dai chuan a sawi. Hei bakah hian Arunachal khaw hming tarlanna signboard-te chu sticker hmangin hliah an ni bawk a ni, a ti.