Nagaland, AP leh Sikkim-ah oxygen plant thar hawng

Hripui leng mek karah hmarchhak state hrang hrangten health facility thuam chakna turin hma an la mek.

Nagaland
Nagaland chief minister Neiphiu Rio chuan Nilaini khan Phek district hospital-a oxygen generation plant siam thar a hawng.

CM Rio chuan United Nations Development Programme (UNDP) India leh Japan sorkar chungah oxygen plant an siamsak avangin lawmthu a sawi. "Kan health facility thuamchakna atan leh, hun khirh tak kan tawh mek kan tha min tihchaksa tura hetiang thil min tihsak vangin in laka ba lian tak kan nei a ni," tiin Nagaland mipuite aiawhin lawmthu a hrilh.

Thawhlehni khan Nagaland CM hian Tuensang district hospital-a oxygen generation plant siam thar chu a lo hawng tawh bawk. He plant pawh hi state sorkar, UNDP leh Japan sorkar thawkhoin an din a ni bawk.

Arunachal Pradesh
Nilaini khan Arunachal Pradesh chief minister Pema Khandu chuan oxygen plant thar pahnih a hawng. Heng plant-te hi Tomo Riba Institute of Health and Medical Sciences (TRIHMS) leh Chimpu-a Dedicated Covid Hospital (DCH)-ah siam an ni.

Chief Minister chuan oxygen plant-te hi UNDP-in a siamsak nia sawiin, lawmthu a sawi. UNDP vek hian Pasighat-a Bakin Pertin General Hospital-ah plant pakhat a siam mek tih sawiin, hman theih tura peih thuai a ni ang, a ti.

Khandu chuan DRDO-in TRIHMS-ah 1000 LPM( litre per minute) oxygen generator a siamsak dawn tih a sawi bawk.

Sikkim
Sikkim khawpui, Gangtok-a STNM Hospital-a Pressure Swing Adsorption (PSA) medical oxygen generation plant siam chu Thawhlehni khan chief minister PS Golay-a'n a hawng. He plant hi 1,000 LPM niin, a hmain he hospital-ah vek hian 500 LPM oxygen plant siam a lo ni tawh bawk.

Oxygen plant thar hawn hi state sorkarin PM Cares Fund hmanga a siam niin, May 28 aṭang khan hna thawh ṭan a ni a, Thawhlehni khan hman theih turin an hawng ta a ni.

STNM hospital-a oxygen plant thar bakah hian district hospital dang paliah siam mek an ni bawk a, hengte hi Rango-a 1,000 LPM bottling plant nen state-in medical oxygen an mamawh ang chu an nei thei dawn tih CM chuan a sawi.