Assam NRC hotu hlui lakah complaint thehlut

Assam-a NGO, Assam Public Works (APW) chuan National Register of Citizens (NRC) state coordinator Prateek Hajela leh a thawhpui ṭhenkhatte chu NRC update-ah dan loa an state-a pem lutte dah tela puhin an lakah complaint a thehlut.

NRC final list hi kum 2019, August 31 khan tihchhuah a ni a, mahse dilna thehlut zingah nuai 19 chuang zet hmaih an ni.

1995 batch IAS officer Assam-Meghalaya cadre, Hajela hi Supreme Court chuan kum 2013 khan NRC state coordinator atan hian a ruat a ni. Hajela leh a thawhpui ṭhenkhatte chuan officer, data entry operator leh minority leader ṭhenkhat thurualpuiin NRC-a dan loa pem lutte dah luh an nih theihna atan Family Tree Verification process an tidanglam nia sawi a ni.

APW president Aabhi­jeet Sarma chuan Nilaini khan CID Additional Direc­­tor General hnenah complaint hi a thehlut a, tuna NRC coordinator ni mek chuan Supreme Court leh Gauhati High Court-a affidavit a thehluhah, NRC list-ah chuan dan loa pem lut leh rinhlelhawm 40% vel telh an ni tih a tarlang. "Dan loa pem lut tam tham leh, rinhlelhawm eng emaw zat list-a telh an nih avangin thil fel tawk lo a awm ngei tih a lang a ni," a ti.

Sarma chuan family tree verification chu dik taka kalpui se list-a tel diltute nihna chu chiang takin a hriat dawn a ni, tiin a sawi. Mahse a software hi NRC state coordinator hlui Hajela buatsaih niin, a buaipuitu data entry operator leh officer ṭhenkhat chu migrant community zinga mi an nih avangin midang tan enfiah theih a ni lo niin a sawi.

APW hian a hmain CBI anti-corruption branch-ah NRG update-na tur fund pek chu tihchingpen nia sawiin complaint a lo thehlut tawh bawk.