Tripura sorkarin zirtirtu 900 chuang dah nghet
Tripura sorkar chuan zirtirtu 900 chuang chu fixed service-a an thawh hun a tawp hnuah a dah nghet. Zirtirtu dah nghet tharte hi science zirtirtute an ni.
State sorkarin recruitment rules a siamah zirtirtute hi dah ngheh an nih hmain kum nga chhung fixed pay-in an thawh phawt a ngai a ni. Tun ṭuma zirtirtu dah nghette kum 2012-a sorkar hmasa, left front sorkarin fixed pay scale-a thawk tura a lakte an ni. Kum 2017 kha dah ngheh hun tur ni mah se sawn hlat zel niin Nilaini khan sorkar chuan dah nghet an ni tih hi a puang ta a ni.
Education minister Ratan Lal Nath chuan, "Kum 2017 khan heng zirtirtute hian kum nga chhung fixed pay-a an thawh hun chu an hmang zo a, mahse sorkar hmasa khan regular post-a dahna tur a siam mai loh avangin dah nghet mai lohin an awm a ni. An harsatna te hriatin regular post hi siam a, dah ngheh an ni ta a ni," a ti.