Meghalaya : Vawiin aṭangin Shillong-ah taxi 15% tlan phalsak

Meghalaya sorkar chuan hri leng vanga khuahkhirhna a siamte thlahdul chhoin, vawiin aṭangin public transport (local taxi) chu Shillong khawpuia 15% leh East Khasi Hills district pawn lamah 30% an tlan a phalsak tawh dawn.

Health minister AL Hek chuan High Court thupek anga review meeting an neihah he thutlukna hi siam a nih thu a sawi. Taxi service hi phalsak ni dawn mah se, taxi operator-te chuan an motor-ah Covid-19 vaccine an la ngei tih finfiahna, vaccination certificate an tarlan zel a ngai dawn tih a sawi. Bus te erawh chu service phalsak an la ni dawn lo.

Minister chuan restaurant leh hotel-te pawh hawn phal a ni dawn tih a sawi a, mahse home delivery leh takeaway chauh tih phalsak an ni ang. Rural area-ah chuan hotel leh tea shop-te hawn phal niin, dawr chhungah customer-te chawlh tir erawh phal a ni lo.

Hri kai enkawl mek, Corona Care Centre-a awmte chu sorkarin a thlawnin ration a pe tawh dawn bawk. A hma chuan home isolation-a awmte chauh pek an ni ṭhin.

Amit Shah-a'n Meghalaya tlawh dawn
Union home minister Amit Shah chuan July thla chawlhkar hnihnaah Meghalaya a tlawh dawn.

BJP MLA, state health minister ni bawk AL Hek chuan Amit Shah zin tur thu hi a sawi a, mahse Meghalaya a tlawhna chhan tur erawh a sawilang lo.

Amit Shah hian January 23 khan Shillong a lo tlawh tawh a, North Eastern Council (NEC) 69th plenary session a hmanpui a ni. Hemi ṭum hian North East Students’ Organisation (NESO), Confederation of Meghalaya Social Organisation (CoMSO) leh pawl dang ṭhenkhat chuan union home minister hi hmuin, Meghalaya-a Inner Line Permit (ILP) system hman an phut thute an lo hrilh a ni.

February thla khan chief minister Conrad K Sangma leh deputy chief minister Prestone Tynsong-te chuan Delhi-ah Shah hi hmuin, ILP chungchang hi an sawipui leh bawk.

Meghalaya-a pressure group hrang hrangte chuan Amit Shah-a'n an state a tlawh hunah ILP chungchang hi lo sawipui ve leh ngei an tum. Union minister hmuh tumtu zingah hian Khasi Students’ Union (KSU), Federation of Khasi-Jaintia Garo People (FKJGP), Ri-Bhoi Youth Front (RBYF) leh Hynniewtrep National Youth Front (HNYF)-te pawh an tel.