Assam : Ni 7 chhunga hri kai 10 chuang awmna Total containment zone-ah puan an ni zel dawn

Assam sorkar chuan hri leng darh tur venna atana kaihhruaina a siamah, ni 7 chhunga hri kai thar 10 chuang awmna bial chu containment zone-ah a puang zel dawn. Hemi chungchang hi district tina thuneitute pawh hriattir an ni.

Chief secretary Jishnu Baruah chuan hriattirna hi tichhuakin, district magistrate-te chuan National Health Mission director be rawnin, ni 7 chhunga hri kai thar 10 chuang awmna chu total containment zone-ah an puang zel dawn tih a sawi. Hemi huam chhungah hian emergency service chauh kalpui phal a ni ang. Eitur leh ran chaw zawrhna dawrte chu tlai dar 5 thleng hawn phalsak an ni thung.

State sorkar chuan positive rate awmdan azirin state chhunga district 33-te category pathumah a ṭhen a ni. Positive rate sana, high positive rate caterogy-ah Morigaon, Biswanath, Goalpara leh Golaghat district-te dah an ni a, moderate postivity category-ah district 20 dah an ni bawk. Hri leng dinhmun ziaawm chhohna category-ah district 10 an awm bawk a, heng zingah hian Kamrup Metro pawh a tel a ni.