Manipur-in Class 10 leh 12 topper puang dawn lo

Manipur education minister S Rajen Singh chuan kuminah Covid-19 hri leng vanga COHSEM leh BOSEM hnuaia Class 10 leh Class 12 board exam ṭhulh a nih avangin, result tihchhuah hunah pawh topper puan an ni dawn lo tih a sawi.

Minister chuan Class 10 leh 12 zirlaite tana mark pek dan tur sawifiahin, subject tinah full mark 100 niin, heng aṭang hian mark 20 Internal Assesment mark-ah dah a ni a, mark 30 chu kum hmasa lama an mark hmuh aṭangin siam a ni ang. A bak mark 50 chu pre-board exam (term test leh periodic test)-a an mark hmuh dan aṭangin siam a ni dawn a ni.

Supreme Court-in July 31 hmaa Class 10 leh 12 board exam result tichhuak tura thupek a tihchhuah thu Minister chuan a sawi a, state education department chuan hun tiam ral hma ngeiin result hi tihchhuah a tum tih a sawi bawk.

BOSEM hnuaia Class 10 zirlai register hi 44,000 chuang an awm a, COHSEM hnuaia Class 12 zirlai register 29,517 an awm bawk.