AAPSU-in BRO thil tar siamṭha vek turin phut

All Arunachal Pradesh Students' Union (AAPSU) chuan Border Roads Organisation (BRO) chu an state chhunga an thil tar - signboard, foundation stone, notice board-te chu siamṭha vek turin an phut.

AAPSU chuan structure hrang hrangte chu state chhunga siam vek a nih laiin, an thil tar tam takah Arunachal state nihna chu ngaihthah sak an ni fo tih an sawi. "Tun hnaia Kimin-Potin kawng siam thar hawnah pawh foundation stone-ah Arunachal Pradesh hming chu dah tel a ni lo," an ti. Hetianga Arunachal Pradesh hming hmaih sak an ni zel hi an enliam mai mai tawh dawn lo tih an sawi a ni.

BRO chu state chhunga road project pawimawh tak takte tikhawtlaiah an puh bawk a, hun tiam chhung ngeia project zawng zawngte zo fel vek turin zirlai pawl chuan an phut bawk.

Tun hnaia defence minister Rajnath Singh-a'n BRO kawngpui siam tharte a hawn ṭuma AP-a Kimin khua, Assam state-a 'Bilgarh' tia an lo ziah avangin Pathianni khan BRO chuan AP mipuite hnenah ngaihdam an dil a ni. An thiltih hi tihsual tak zet a ni a, state mipuite rilru tihnat an tumna a ni lo tih an sawi.