Manipur PHE minister L Dikho-a'n ‘National Corona Warrior Award’ dawng dawn

Manipur PHE minister L Dikha chu Covid-19 hri leng dona kawngah social work lama thawk ṭha, ‘National Corona Warrior Award’ dawng tur zingah thlan tel a ni.

July 12-a New Delhi-a 35th Rashtriya Samarpan Vijay Diwas hawnna inkhawm neihah national leh international award dawng tur thlante hi chawimawina hlan an ni dawn tih Dalit Sahitya Academy Manipur chuan a tarlang. Chawimawina dawng tur hian Manipur mi 65 thlan an ni.

Dikho hi nikuma Manipur-a Covid-19 hri a len tirh aṭangin hri dona kawngah hma a la nasa hle. Kum 2020 March thla khan Senapati district hospital tan TrueNat khawl leh damdawi hmanrua hrang hrang eng emaw zat a pe nghal ani. A hnuah hill district zawng zawngten TrueNat khawl an neih theihna turin hma a la zui bawk.

Heibakah hian Senapati district hospi­tal-a Covid-19 hri kai, naupai laite tan ope­ration theatre siamna tur hmanrua cheng nuai 15 man a pe a; Paomata, Laii leh Mao PHC tan oxygen support ambulance pathum a pe bawk a ni. Nikum khan an khua, Punanamei-ah quarantine centre siamin, a bial chhung mi, state dang aṭanga hawte lo lamna tur motor pawh a ruahman sak vek bawk a ni.

Minister chuan chawi­mawina dawng tura thlan tel a ni chu lawmawm a tih thu a sawi rualin, "Hri dona kawngah thawk ṭha ber ka ni lo. Mahse hri leng dona kawnga kan theihtawp kan chhuah venate min lo hriatpui ve hi lawmawm ka ti hle a ni," a ti.

Tun hnaiah minister hi a nupui Martha nen Senapati leh Kangkopi district-a thingtlang khaw kilkhawr zawkah Covid-19 damdawi leh oxygen concentrator semin kein an kal kual bawk.