Tripura CM hluiin pawikhawihna thleng chungchang PM leh President hnenah thlen a tum

Tripura chief minister hlui leh Communist Party of India (Marxist) hruaitu Manik sarkar chuan an party member-te beih an nih fo chungchang chu prime minister Narendra Modi leh president Ram Nath Kovind hnenah thlen a tum tih a sawi.

Eptu hruaitu Sarkar chuan state chhunga tharum thawhna thleng ṭhinah BJP kaihhruai sorkar leh chief minister Biplab Kumar Deb bakah governor Ramesh Kumar Bais-te chu sawiselin, pawikhawihna thleng tur thunun zo loah a puh.

"March 3 khan CM chuan state assembly-ah pawikhawihna leh inbeihna a thlen tawh loh tur thu a sawi a. Mahse he thu a sawi hnu aṭang hian eptu party member beihna ṭum 200 a thleng leh tawh a ni," tiin Sarkar chuan a tarlang.

Police station-a kawllai mi panga an thi tawh tih sawi bawkin, hemi chungchangah CM a ngawi reng chu a chhan a zawt bawk. "CM leh home minister hian he thil thleng chungchangah hian engmah sawi an nei zui lo a, hei hi a ṭha lo hle," a ti.