State-te ventilator pek rualkhai lo : Congress MP

Assam-a Congress MP Gaurav Gogoi chuan sorkar laipuiin hmarchhak state-te ventilator a pek dan chu a fek tawk lo tih a sawi.

Union minister Harsh Vardhan hnenah lehkha thawnin, Gogoi chuan hmarchhak state hrang hrangah hri kai enkawl an la pung zel tih sawiin, hetih lai hian sorkar laipuiin state hrang hrang hnena ventilator a pek danah thil fel tawk lo awmin, ennawn a ṭul thu a sawi. June 22 thlenga state-te hnena ventilator pek dante enin, state ṭhenkhat ngaihsak leh duhsak bik an awm nia a lan thu a sawi a ni.

"State tina active case awm dan nena thlirin, ngaihthah leh duhsak bik deuh an awm ngei niin a lang. June 22-ah Assam-ah active case 32,975 an awm laiin vetilator 1,000 pek a ni a, hetih lai hian active case 3,910 awmna Uttar Pradesh-ah chuan ventilator 6,316 pek a ni thung," tiin Gogoi chuan a sawi. Manipur, Meghalaya leh Mizoram-te pawh Bihar leh Jharkhand nena khaikhinin active case an tam zawk hle a, hetihlai hian heng state-te tana ventilator pek dan erawh a rualkhai lo hle a ni, a ti. Bihar tan hian ventilator 500 leh Jharkhand tan 1,960 pek a nih laiin, Manipur tan 447, Meghalaya tan 86 leh Mizoram tan 115 pek a ni, a ti. Gogoi chuan state hrang hrang hnena ventilator pek dan rualkhai lo tak chu ngaihtuah ṭhat ngai tak nia a ngaih thu a sawi a ni.