Assam : Kum 18 hnuai lamah hri kai 96.67% in an pung

Assam state-ah Covid-19 hri leng thawh hnihna thlengah kum naupang lamah hri kai thar an pung nasa hle.

National Health Mission (NHM) in statistics a tichhuahah, kum 18 hnuai lam zinga hri leng thawh khatna aia a thawh hnihnaa hri kai punna hi 96.67% zet a tling a, kum 18 hnuai lam zingah hripui thihpui hi a let thumin an tam bawk. Hetih lai hian state pumah hri leng thawh khatna aia a thawh hnihnaa hri kai punna hi 27.31% chauh a ni thung.

State health minister Keshab Mahanta chuan April leh May thla inkara hri kai thar sample enfiah tura an thawn zingah 77% chu Delta variant kai an ni tih a sawi.

NHM statistics-a a landanin, nikuma hri leng thawh khatna thlengah khan kum 18 hnuai lam hri kai 17,457 an awm a, a thawh hnihnaah chuan 34,333 an awm thung. Hri leng thawh khatnaa hri kai zingah hian kum nga hnuai lam 3,014 awmin, kum 6-18 inkar 14,443 an awm a, a thawh hnihnaah, June 25 thleng chhinchhiahah chuan kum nga hnuai lam 5,778 leh kum 6-8 inkar hri kai 28,555 an awm a ni. Kum 5 hnuai lam zinga hri kai punna hi 91.70% niin, kum 6-18 inkara a punna hi 97.71% a ni.

Hri leng thawh khatnaah Covid-19 vanga thi, naupang kum 5 hnuailam mi pathum an awm laiin, hri leng thawh hnihnaah chuan mi 19 an thi tawh. Kum 6-18 inkarah pawh hri leng thawh khatnaah mi paruk an thih laiin, a thawh hnihnaah chuan mi 15 an thi tawh bawk.