Tripura : Gram panchayat 73-ah vaccine 100% pe tawh

Tripura state-a district pariat-a gram panchayat 73 huam chhungah Covid-19 vaccine chu a la thei tur chin hnenah a dose khatna pek kim an ni tawh. State pumah gram panchayat/village committee hi 1,178 an awm a ni.

Tripura state hi ram pum huap pawhin vaccine pe chhuak ṭha ber an ni mek. State chhungah North Tripura chu vaccine pe ṭha ber niin, South Tripura in a dawt.

Chief minister Biplab Kumar Deb chuan social media lamah hemi chungchang hi tarlangin, "District hrang hranga gram panchayat 73-a vaccine 100% pek a ni hi a lawmawm ka ti hle a ni," tiin health worker, official leh mipuite chungah lawmthu a sawi.

"Kan tum ber chu coronavirus darh zel tur venna atan state puma Covid-19 vaccine pek chhuah thuai hi a ni," tiin CM chuan mipuite chu hriselna ṭha nei tura duhsakna hlanin, fimkhur tak leh Covid-19 dante zawm zel turin a chah.