Kumina hri dona atan sum sen kum hmasa aiin a tlem : Meghalaya CM

Meghalaya chief minister Conrad K Sangma chuan nikuma Covid-19 hri leng thawh khatna dona atana an sum sen aiin kumina a thawh hnihna thlenga an sum sen chu a tlem zawk tih a sawi.

State sorkar hian hri leng thawh khatnaah khan hri dona atana kawng hrang hranga a hmalaknaah cheng vaibelchhe 400 dawn a seng a ni.

CM Sangma chuan, "Nikum khan state pawn lama tangkhangte hruai hawna tur te, quaratine centre-a an awmna leh ei leh in buaipuina atante sum tam tham tak sen a ni. Thil tih harsa tak a ni a, mahse kan state mi leh sate theihtawpa ṭanpui chu kan tum tlat a ni," tiin a sawi.

Kuminah chuan sum sen pawh a ziaawm deuh tih sawiin, sorkar pawhin a tlem thei anga sum sen dan ngaihtuahin hmalakna hrang hrang pawh rualkhai tur angin a siam a ni, a ti.

Sangma chuan Covid-19 vaccine chu dose 90,000 vel an la kawl mek tih sawiin, ni hnih thum hnuah dose 40,000 dang an dawng leh dawn tih a sawi. Sorkar laipui chuan state hrang hrang hnenah vaccine chu an mamawh dan azirin a pe zel dawn tih a sawi bawk.