Covid-19: Hmarchhak dinhmun

Assam-ah Covid-19 kai hmuh chhuah belh zel an ni a, nimin thleng khan hri kai hmuh tawh hi mi 1,485 an tling tawh a ni

 

Assam-a hri kai hmuh tawh zinga mi 284 chu enkawl dam an ni tawh a, enkawl mek 1,194 an awm. Hri kai zinga mi paliin an thihpui tawh bawk a ni. 

Hri kai hmuh belh zel an nih avangin Kamrup metro­politan district thuneitute chuan Guwahati khawpui chhunga Ajanpir Path leh Borbari area chu containment zone-ah a puang thar. Hetih lai hian Fancy bazar leh Fatasil Tinali bialah hri kai hmuh belh thar an awm loh avangin containment zone-a puan chu hlih a nih tawh thung. 

Health minister Himata Biswa Sarma chuan state chhungah hri inkaidarh an la awm lo tih sawiin, hri kai hmuh tawh zinga 1,200 dawn chu May 4 hnu lama state dang aṭanga hawte an ni tih a sawi. Hei vang hian hmun dang aṭanga hawte khung hran chu ngaih pawimawh a ṭul thu a sawi. 

Nagaland-ah Chennai aṭanga haw mi parukin hri an kai tih hmuh chhuah belh a ni a, heng mite nen hian an state-a hri kai awm zat hi 49 an tling tawh. 

Nagaland-a hri kai zinga 31 hi Dima­pur-a mi an ni a, Kohima-ah mi 13 leh Tuensang-ah mi panga an awm bawk. 

Health minister S Pangyu Phome chuan hri kai hmuh chhuah tharte hi Dimparu vek a ni tih sawiin, mipa panga leh hmeichhe pakhat an ni tih a sawi.  Nagaland-a hri kai hmuh chhuahte hi Shramik special train hmanga Chennai 

aṭanga haw te vek an ni. 

Nimin khan Arunachal Pradesh-ah hri kai pahnih hmuh chhuah an ni leh a, anni nen hian hri kai hmuh tawh hi mi 22 an awm tawh a ni. 

Chief minister Pema Khandu chuan hri kai hmuh tharte hi an taksaa natna langchhuak lo, asymptomatic an ni tih sawiin quarantince centre aṭangin Covid care centre-ah sawn nghal an nih thu a sawi. 

AP-ah hian Thawhṭanni khan hri kai hmuh chhuah hi mi 12 an awm a, ni khata hri kai hmuh chhuah tam ber ni a ni. Hri kai hmuh tawh zinga pakhat chu enkawl dam a ni tawh a, hri kai mek mi 21 chu asymptomatic vek an ni. 

Meghalaya-ah Uttarakhand aṭanga haw mi pakhatin Covid-19 a kai tih hmuh chhuah belh a ni bawk. Meghalaya-ah hian hri kai hmuh tawh hi mi 28 an tling tawh a, an zinga pakhatin a thihpui a, mi 12 chu enkawl dam an ni tawh. 

CM Sangma chuan hri kai hmuh thar hi South West Garo Hills district-a mi, quaran­tine centre-a awm mek a nih thu a sawi. 

Tripura-ah Thawhṭanni khan hri kai hmuh chhuah belh mi 107 awmin, ni khata hri kai hmuh chhuah tam ber ni a ni. He hri kai hmuh tawh hi mi 421 an awm tawh. 

Chief minister Biplab Kumar Deb chuan Thawhṭannia sample 578 test zinga mi 102 chuan hri an kai tih hmuh chhuah a nih thu leh, hmun danga zin chhuahna nei vek an nih thu Thawhṭanni zan khan a sawi. Mipuite chu fimkhur tura chahin, sorkarin kaihhruaina a siamte zawm ṭha turin a ngen nghal  bawk. 

Tripura-ah hian sample 27,475 test a ni tawh a, hri kai zinga 173 chu enkawl dam an ni tawh bawk a ni.