NIA-in Akhil Gogoi lakah thubuai dang thehlut
National Investigation Agency (NIA) chuan Thawhlehni khan Assam-a Sibsagar MLA leh Raijor Dal president Akhil Gogoi lakah thubuai dang an thehlut leh.
Regional party, Raijor Dal chuan NIA thiltih hi sawiselin, BJP kaihhruai state sorkarin hun rei tak Akhil Gogoi tan tir chhunzawm zel a tumna hmanrua niin an puh. NIA-in thubuai an thehluh belhah hian Akhil Gogoi an puhna chungchanga witness hming leh address pawh engmah ziah lan a ni lo tiin Raijor Dal working president Bhasco De Saikia chuan a sawi.
Chandmari police station-a Gogoi laka thubuai thehluh chungchanga final hearing chu nimin khan neih a ni a, final hearing neih hma niin NIA hian thubuai dang hi an siam belh sak leh a ni. "Hei hi Assembly by-election neih tura Gogoi a campaign theih lohna tur leh, jail-a tan tir chhunzawm zel tumna a ni. BJP hian by-electioin neih tur atan hei hi an ruahman a ni," tiin Saikia chuan a sawi.
Gogoi hi June 22 khan National Investigation Agency (NIA) court chuan a thubuai pakhatah bail-a chhuah a phalsak a, hei bakah hian Chabua police station-a CAA dodalna lantir chungchanga thubuai siamsakah chuan thiam chantir a ni tawh bawk.
Raijor Dal president hian kumina state assembly inthlan neihah khan jail-a tang chungin a chuh a, Sibsagar bialah hneh taka thlan tlin niin, Assam-a jail tang chunga assembly inthlana hnehna chang thei hmasa ber a ni.