2-child policy hi Muslim-te retheihna umbona tur a ni : Assam CM

Assam chief minister Himanta Biswa Sarma chuan a kaihhruai sorkarin an state-a two-child policy kalpui a tum chungchanga sawiselna chu chhangin, he policy hi a bikin Mulsim minority-te retheihna umbona tur leh ziak leh chhiar thiam lo tihtlemna tur awmchhun a ni, a ti.

State sorkar hnuaia scheme hrang hranga hamṭhatna awmte fa pahnih nei chin chauh huamtir tum chungchang hian sawizui a hlawh hle. Mahse CM chuan, "Muslim te aṭangin dodalna kan hmu lo. All-Assam Minority Students Union hnuaia pawl pahnite pawhin ṭum hnih min hmu tawh a, 2-child policy kalpui rawtna pawh ṭha an tih thute an sawi a, Assam-a Muslim-te chuan population-control an mamawh thute an sawi a ni," a ti.

July thla chhungin Muslim mithiamte pawh kawm a tum thu leh, anni pawhin sorkar policy hi an thlawp ngei a rin thu Sarma chuan a sawi. July 4 hian Muslim intellectual 150-te chu meeting neihpui turin a sawm tawh a, Muslim pawl hrang hrangte pawh kawm a tum thu a sawi bawk.

State sorkarin two-child policy kalpui a tum hi Bangladesh aṭanga pem lut Muslim-te vang nia sawi a awm a ni.