FB-a Manipur CM sawiselna post-tu man

Manipur chief minister N Biren Singh sawiselna thu Facebook-a post-tu, kum 36 mi Henkhokhai Singsit chu police-ten an man hnuah ni 12 chhung judicial custody-ah dah a ni.

Police-te hian All Tribal Students’ Union Manipur (ATSUM) finance secretary hlui, Singsit hi Kangpokpi district-a Motbung khuaa a chenna inah Thawhṭanni khan an man a ni. IPC section 294/509/34 leh IT Act 67-A hnuaiah Singsit lakah FIR thehluh a ni.

Singsit hian a Face­book profile, 'Kakai Singsit' tih hmingin CM sawiselna thu hi a post a, hei hi a darh nasa hle. A thuziak hi CM hmusitna leh zah lohna lian tak nia sawiin, complaint hi thehluh a ni. A thil post hmang hian tribal mipuite chu CM laka hel turin a fuih nia puh a ni bawk.

Hetih lai hian Singsit counsel chuan Singsit hi ATSUM financial secretary hlui a nih bakah social worker ṭha tak a nihthu a sawi thung. A thu post-ah hian ram leh sorkar dodalna lam hawi a ziak lo a, IPC 124-A hnuaia thubuai siamsak theih a ni lo tih a sawi. Singsit hian a ngaihdan ziak turin Constitution Article 19-in Freedom of Speech leh Freedom of Expression a pe a ni, a ti.

Kumin kumtir lam khan Singsit leh ATSUM member dang pahnihte chu state sorkarin Autonomous District Council (ADCs) inthlan neih tur a tihkhawtlai avanga lungawi lohna an lantir vangin man an lo ni tawh bawk.