NSF-in school fee awl tir vek turin phut

Nagaland Students Federation (NSF) chuan state sorkar hnenah an state chhunga sorkar school tinte chu zirlaite fee awltir vek tura hriattirna chhuah turin an phut.

Zirlai pawl chuan 'no work, no pay' policy chu khauh taka kengkawh tura sorkar an phut thu sawi bawkin, hri leng vanga zirna inte khar a nih hnuah sorkar school zirtirtu tam zawk chu inthlahdahin, online class kalpui a nih lai pawhin an hna an ngai pawimawh lo hle niin an sawi.

Thawhlehni khan an thil phut chungchang hi NSF hruaitute chuan School education principal director Shanavas C hnenah an thlen a, ani pawhin an thil phut chungchang hi lo ngaihtuahzui a tiam tih an sawi a ni.

Hri leng chuan educa­tion sector a nghawng na hle tih NSF chuan an sawi a, hun rei tak school kal thei loin an awm tawh a, online class kalpui ni mah se hmun tam tak, a bikin rural area-ah chuan technology lam a ṭhat loh avangin harsatna a awm a ni, an ti. Heng hmuna zirlaite pui tur hian ṭhalai lehkhathiamte chu an theih anga hma la turin an ngen bawk.