Nagaland-ah AFSPA thla ruk dang pawtsei

Union home ministry chuan Nilaini khan Nagaland-a sipai hnena thuneihna sang pekna, dan sawisel hlawh tak, Armed Forces (Special Powers) Act (AFSPA) chu thla ruk dang atan a pawtsei. December thla thleng Nagaland state pum chu 'disturbed area' ah puan chhunzawm a ni.

Nikum December thla khan thla ruk atan AFSPA hi pawhsei a ni a, June thla thleng a huam a ni. Mahse union ministry chuan Nagaland state dinhmun chu a la him tawk lo a, hei vang hian civil sorkar pui turin armed force hman chhunzawm a la ṭul niin a sawi a, a pawtsei leh ta a ni.

Chief minister Neiphiu Rio chuan nikum February thla khan Nagaland politics buaina chu chinfel a nih hma chuan disturbed area-ah an la awm chhunzawm zel tur thu a lo sawi tawh bawk. State cabinet-in dan sakei tia sawi ṭhin, AFSPA hlip turin ngen ṭhin mah se, state chhung buaina awm chhung chuan sorkar laipui chuan a pawtsei zel dawn niin a sawi.

Nagaland-Assam ramriah inep leh
Nagaland-a Mokok­chung district-a Tzurang­kong range huam chhunga Vikuto khaw bulah Assam Police-ten camp siam an tum avangin ramri boruak a ṭha lo chho leh hle nia sawi a ni.

Additional Superin­tendent of Police (ASP) kaihhruaiin Assam police team, mi 100 vel chu Thawhlehni tlai khan Vikuto khaw bulah hian lutin, camp/outpost siam an tum a ni.

He thil thleng hi an hriat veleh Nagaland aṭangin 12 IRBn ‘C’ Coy section commander chu kal nghalin, Assam police-te hnenah Nagaland state chhunga camp siam an tum chhan a zawtfiah nghal a ni. Assam Police-te chuan he hmun hi Assam-in ram inchuh lai nia a puan avangin, Vikuto khaw miten hna thawhna atan an hmang em tih leh, an hmang tur dang tura kal an nih thu an lo hrilh a ni.

Nagaland lam hian an awmna hmun hi chhuahsan turin ngen mah se Assam police-te hi an insawn chhuak duh lo a, Mokokchung leh Jorhat DC-te chu inbe turin an phut.

Assam police-te an insawnchhuah duh loh vangin Mangkolemba SDPO, Tzurangkong border magistrate, 12 IRBn 'C' company-a section khat leh Tzurangkong khua aṭanga volunteer 70-te chu an awmna hmunah kalin, camp an siam zui ve nghal bawk. Intihbuaina lian tham erawh a thleng lo nia sawi a ni.