Special NIA court-in Akhil Gogoi thiam chantir

Special National Investigation Agency (NIA) court chuan Assam MLA Akhil Gogoi chu Unlawful Activities (Prevention) Act hnuaia thubuai siamsakah Ningani khan thiam chantirin chhuah zalen nghal a ni.

Akhil Gogoi hi kum 2019, December thlaa Assam-a Citizenship Amendment Act (CAA) dodalna lantira nawrh huaihawta tharum thawhna thlenga inhnamhnawiha puhin UAPA hnuaiah thubuaite hi siamsak a ni.

Special NIA court chuan thutlukna a siam hnuah, Guwahati Central Jail-ah release order hi a thawn nghal a ni. Hemi hnu hian independent MLA, Gogoi hi enkawl a nih mekna Gauhati Medical College and Hospital aṭangin chhuah tir a ni ta a ni.

Raijor Dal hotu, Akhil Gogoi chuan, " Jail-a min tan tir theihna turin theihtawp chhuah mah se, a tawpah chuan thudik chu a dingchang ta a ni," tiin chhuah a nih hnua chanchinbu mite a kawmnaah a sawi.

Gogoi hian chhuah a nih hnuah a thawmhnawte an in lama a dah hnuin, Guwahati-a Hatigoan area-a CAA martar, Sam Stafford nu leh pate chu a tlawh nghal a ni. Hemi hnu hian Krishak Mukti Sangram Samiti leh Raijor Dal office-te a tlawh bawk a, nimin khan a bial, Sivasagar lam a pan nghal bawk.