Union minister Rijiju leh AP CM Khandu lakah FIR thehlut

Arunachal Pradesh-a political party pali chuan union sports and youth affairs minister Kiren Rijiju leh state chief minister Pema Khandu-te chu an state ram chin tihdanglam tum leh, Constitution leh Acts eng emaw zat palzuta puhin an lakah FIR an thehlut.

Political party-ten FIR an thehluhna chhan hi, June 17-a defence minister Rajnath Singh-a'n Border Roads Organisation (BRO)-te kawngpui siam a hawn ṭuma thil thleng kalzel a ni. Hemi ṭuma kawngpui hawn zingah hian AP-a Kimin-Potin inkar km 20-a siam thar pawh a tel a, mahse BRO-te hian Papum Pare district-a Kimin khua hi Assam-a Bilgarh khua angin an tarlang a ni.

Kimin police station-ah People’s Party of Arunachal, Janata Dal (United), Congress leh JD (Secular) aiawhte FIR hi an thehlut a ni. Complaint an thehluhah hian Khandu leh Rijiju-te hian Arunachal Pradesh Statehood Act of 1987, Bengal Eastern Frontier Regulation of 1873 (Restricted Area Permit) leh Arunachal Pradesh (Land Settlement & Record) Act of 2000 leh Constitution of India-a Article 3 palzutah an puh. State ram chin tihdanglam tuma puhin, Kimin-Potin road hawnna inkhawm buatsaih a nih hnuah tualchhungah lungawi lohna nasa tak a thlen phah a ni, an ti.

June 21-a CM Khandu-an media mite a kawmnaah khan Kimin khaw hming tih dik loh chungchang a hriat thu sawiin, defence minister Rajnath Singh zuitu union minister Rijiju pawh a hrilh thu a sawi. Mahse hemi hnu hian an pahnih hian he thil tihsual chungchanga thuchhuah leh sawifiahna engmah an la nei lo a ni, tiin an sawi.