Manipur-in vaccine dose la kim tawh tan Covid-negative report a phut tawh dawn lo

Manipur sorkar chuan an state-a lut turte tana Covid-19 negative report a phut chu Covid vaccine dose la kim tawh tan a ngai ve dawn lo tih a sawi.

Deputy secretary (health and family welfare) Soiminlian Lengen chuan thuchhuah thar hi tichhuakin, state pawn aṭanga lut, Covid-19 vaccine dose hnih la tawhte chuan Manipur an thlena Imphal Airport emaw, Moa Gate leh Jiribam-a entry point-a Covid-19 negative test report an lantir zel ngai ṭhin chu tihtawp a ni tih a sawi. Mahse vaccination certificate erawh an entir a ngai dawn thung a ni.

Vaccine la lo emaw, dose khatna chauh la erawh chuan Manipur an luh dawnin Covid negative report an neih a ngai thung ang.

Manipur sorkar chuan hri leng vanga khuahkhirhna a siamte pawh a thlahdul chho mek a, hei bakah hian vaccine pek hna pawh chak zawka kalpui a tum. Sorkar chuan vaccine la duh, mi 150 chin awmnaah chuan a hranpaa pek dan tur ruahmanna siamsak zel a tum tih a sawi.