Assam CM leh Nagaland CM-im ramri chungchang sawidun

Assam chief minister Himanta Biswa Sarma leh Nagaland chief minister Neiphiu Rio-te chu kar liam ta Zirtawpni khan New Delhi-ah inhmuin, state ramri chungchang an sawidun.

Assam CM Sarma chuan a twitter-ah Nagaland CM nena an inhmuh thu hi sawiin, state pahnihte thawhdun theihna tur hrang hrangte bakah, ramri chungchang pawh an sawidun tih a tarlang.

Sarma hian a hmain Assam sorkar chuan hmarchhak state dangte nena ramri buaina an neih mek chu chingfel turin theihtawp a chhuah tur thu a lo sawilang tawh a ni. A kaihhruai sorkarin a ngaih pawimawh hmasak tur a ni tih a sawi.

"Kan unau state dangte nena ramri chungchanga kan buaina neihte chinfel a; tourism, infrastructure leh connectivity lama hmasawnna tura lungrual taka kan thawhho theihna tur ruahmanna siam chu kan tum pawimawh tak zingah a tel a ni," tiin Sarma chuan a sawi a ni.

Tun hnaiah Assam police leh forest department mi leh sate chu Nagaland ram china lutin camp an siam leh a, hei vang hian state pahnihte hian ramriah buaina an nei thar leh a ni.

United Naga Tribes Association on Border Areas (UNTABA) chuan Nagaland sorkar hnenah ramria buaina an neih thar leh chungchangah Assam chu chief minister level inbiakna neihpui thuai turin an lo ngen tawh a, ramria inremna an lo siam lailawkte pawh ennawn leh turin an ngen. Assam police leh forest department mi leh sate chet dan chu an dem thu sawiin, hei hi Assam sorkarin state pahnihte ram inchuh mek chu luah a, dan loa pem lutte awm tir a tumna niin an sawi.