Meghalaya-in college zirlai vaccine la zat report turin ti

Meghalaya sorkar chuan state chhunga college-te hawn an nih hmain, zirlai kum 18 chunglam zinga Covid-19 vaccine la zat hriatchian phawt a tum.

Education minister Lahkmen Rymbui chuan additional chief secretary for education hnenah college hrang hrangte chuan an zirlai, kum 18 tling chin zingah vaccine la eng zat nge awm tih report tir vek tura a hrilh thu a sawi.

"Report-te hi kan zirchiang ang a, college hawn chu him dawn leh dawn loh kan ngaihtuah dawn a ni. College hawn theih a nih hnuah school hawn chungchang chu kan la ngaihtuah ve leh ang," tiin minister chuan a sawi a ni.

Meghalaya-ah hian hri leng vangin April thla atang khan school, college leh university-te khar an ni tawh. Hri leng vangin zirlaite chuan an hun hlu tam tak an hloh tawh a ni tih sawiin, Rymbui chuan online class neih chu zirlai tam tak tan thil harsa tak a ni a, hei vang hian classroom a zirtirna kalpui leh ngei chu a ngai a ni, a ti.

Inrinni khan Meghalaya-ah hian hri kai mek, active case 4,584 an la awm a, heng zingah 1,466 chu East Khasi Hills district-a mi niin, Ri Bhoi-ah mi 794 leh West Jaintia Hills-ah mi 623 an awm. South West Garo Hills chauh chu district zinga active case 100 aia tlem awmna awmchhun a ni.