NRC list-ah MP leh MLA eng emaw zat hming lang lo : ULFA hruaitu Paresh Baruah hming a lang thung

Assam sorkar leh sorkar laipui ṭangkawpin Assam-a cheng, India khua leh tui ni leh ni lo a chhinchhiahna National Register Of Citizens (NRC) chu December 31 khan tichhuah a ni a, MP leh MLA eng emaw zan hming a lan loh laiin, ULFA hruaitu Paresh Baruah hming erawh tarlan a ni.

NRC hi tlangzarh ni tawh mah se siam ṭhat duha nawrna a nasa hle a, politician chal lang tak takte hming hmaih a awm lai, helpawl hruaitu hming chuang hi an hrethiam lo tak zet a ni. Hming lang lo zingah hian All India United Democratic Front (AIUDF) hruaitu leh Dhubri Lok Sabha MP ni bawk Badruddin Ajmal a tel a, a afte hming a lang lo bawk. Hetih lai hian Barpeta Lok Sabha MP Sirajuddin Ajmal hming pawh alang bik lo a, a ni bakah hian MLA hlui eng emaw zat chu an hming a lang lo bawk.

Assam khua leh tuite hming tarlanna National Register Of Citizens (NRC) tichhuah thar hian sawi zui a hlawh hle a, official te pawhin Badruddin Ajimal leh MLA hlui eng emaw zat hming a tel lo hi mak an tih thu an sawi. MP Ajimal chuan Thawhlehni khan thuchhuah siamin, amah mai bakah a chhungkhatte hming a tel loh avang hian Supreme Court hnenah ngenna a thehluh tur thu a sawi a, list tarchhuah vawihnihna-ah chuan telh an nih ngei theih nan hmalak a tum thu a sawi. List tarchhuah leh hun tur pawh hi nawr hmanhmawh a tum thu a sawi bawk. Dhubri MP chuan AIUDF-te'n Bangladesh mi 1971 hnu lama dan lo a Assam-a lut zawng zawng hnawhchhuah an tum vek thu a sawi bawk a ni.

Pathianni zan khan Regis­trar General of India chuan Assam Citizen draft list hma­sa ber hi a tichhuak a, hetah hian mi vaibelchhe 1.9 hming a chuang a ni. Hei hi Supreme Court thuchhuah niin, December 31-ah list hmasa ber hi tichhuak turin SC lam hian thuchhuah hi a siam a ni. List-ah hian Ajimal leh a fate pahnih - Abdur Rahman leh Abdur Rahim te hming a tel ve lo a, anni bakah hian a unaupa Sirajuddin Ajmal hming pawh a tel lo a ni.

Sirajuddin Ajmal hming hi Barpeta aṭanga Lok Sabha member a ni a, Abdur Rahim hi Jamunamukh MLA niin Abdur Raham pawh hi MLA hlui a ni bawk.

Anni bakah hian NRC list tichhuah-ah hian mi pawimawh tak tak hming 24 lai mai a tel lo niin official te chuan an sawi a, MLA leh MLA lo ni tawh ṭhin hming tam tak a tel loh avang hian sawiselna a nasa hle a ni. NRC hi Assam Peace Accord 1985, Rajiv Gandhi Sorkar leh All Assam Students Union (AASU) leh Assam Gana Sangram Parishad-te'n an ziah bawhzuina a ni a, he inremna an ziahah hi dan loa Bangladesh mi Assam-a lutte hriatna tur leh hnawhchhuah an nih theihna tur a ni.

Ajmal chuan list tarchhuah a nih leh hunah chuan Assam khua leh tui diktak te chu an tel ngei tawh dawn niin a sawi a, la tel lo an awm palh a nih pawhin dan hmanga hmalak leh zel dan a awm thu a sawi.