Meghalaya : Congress MLA 2 leh Independent MLA 2-te'n BJP zawm

Meghalaya Congress Party chu an Legislator-te'n an chhuahsan zel a, Thawh­lehni pawh khan senior MLA Alexander L Hek leh MLA dang pathum ten BJP an zawm.

Meghalaya-ah hian Congress party chungkuah buaina neuh neuh a awm a, inthlan hnai tawh hle mah se party mi leh sa pawimawh tak takten Congress party hi an chhuahsan zel a, Alexander bakah hian deputy speaker hlui Sanbor Shullai leh Independent MLA pahnih - Justin Dkhar leh Robinus Syngkon te chuan BJP an zawm ve leh ta a ni.

Union Minister of State for Tourism Minister leh Meghalaya BJP election-in-charge ni bawk KJ Alphons chuan Congress sorkar chu an paihthlak tur thu a sawi uar hle. Alpnons chuan, "Meghalaya-a sorkar eirukna a inhnamhnawih nasa ber kan paihthla dawn a ni" tiin Chief Minister Mukul Sangma hun chu a tawp mek thu a sawi. Meghalaya mipuite pawisa chu Congress sorkarin an ruksak thu sawiin tihtawp a hun tawh a ni, a tibawk.

Hetih lai hian BJP zawm ta Alexander hi BJP tan 1998, 2003 leh 2008 khan a lo ding tawh a, 2009 khan Congress hi a zawm a, 2013 khan MLA atan hian thlan tlin a ni leh a ni. Hetih lai hian Chief Minister hlui DD Lapang chuan Congress legislator ṭhenkhatin party dang zawm san mah se an party-ah nghawng a neih dawn loh thu a sawi ve thung. Congress hruaitu hlun chuan an party nuam ti lo ten an party chu chhuahsan mah se Congress thlawptu dik tam tak an la awm thu a sawi. Lapang chuan an hruaitu ṭhenkhatin party chhuahsan mah se a chhe zawngin party-ah nghawng a nei dawn lo tih a sawi bawk.

Congress Legislator pasarih - Rowell Lyngdoh, Prestone Tynsong, Coming One Ymbon, Sniawbhalang Dhar, Ngaitlang Dhar, P.N. Syiem leh Alexander Hek te chuan tun hnai khan Congress hi an chhuahsan a, heng MLA chhuak tate hi February-a inthlanpui awm turah hian din an tum leh vek a ni.