Nagaland-ah thla ruk atan AFSPA pawtsei

Sorkar laipui chuan Nagaland state pumpui chu hmun ralmuang loah a puang a, thla ruk chhung atan Armed Forces Special Power Act (AFSPA) pawhsei a nih thu a tarlang.

AFSPA,1958 hnuaiah hian sipaite chu thuneihna sang tak pek an ni a, civil mite dap leh kah theihna dan an nei a, hemi a nih avang hian sawisel a hlawh hle a ni. AFSPA hi hmarchhak state leh Jammu and Kashmir-ahte hman mek a ni a, dodalna nasa tak awm ṭhin mah se heng state-ahte hian pawhsei zel a la ni rih. Hetih lai hian Manipur leh state ṭnekhatah chuan nasa zawka nawrna a awm mek a ni.

Hetih lai hian Union Home Ministry chuan Nagaland chu hmun ralmuang lo leh ram buai a nih thu tarlangin, AFSPA hi June thla thleng hman turin pawhsei leh a nih thu a tarlang. AFSPA hman hi a ṭul rih tih thuchhuah chuan a tarlang bawk. Nagaland hi ram buaia an chhiar chhan hi inthahna, tharum thawhna leh ralthuam an man fo vang a nih thu home ministry chuan a tarlang bawk a, hemi a nih avang hian security force te kuta thuneihna tam zawk pek hi a ṭul tih tarlan a ni.

AFSPA hi Nagaland-ah hian kum eng emaw zat hman a ni tawh a, August 3, 2015-a NSCN-IM leh sorkar laipuiin Prime Minister Narendra Modi telpuina ngeia Framework Agreement an ziah hnuah pawh an la hman chhungzawm zel a ni. Vawi 80 chuang zet sorkar leh NSCN-IM te hian inbiakna an neih hnuah Framework Agreement hi an ziak a ni.